اللاذقية في الزمن الصعب!../ محمد فرحات
منشور على صفحة مجموعة اللاذقية- الفيسبوك
——-
Mohamad Farhatاللاذقية
مسؤول
· ٣ س ·
اليوم كان عندي عدة زباين واقفين عالكاش عم يطلبوا،
من بينهم كان في زبونة واقفة ساكتة كل ماقلا تفضلي
شو طلبك تقلي يلا خليني لآخر شي.
انا عرفت انو بدها تطلب شي وخجلانة بحكم انو مبين
حالها تعبان، تركتها للآخير متل ماطلبت، بعد شي تلت
ساعة حتى فضي الكاش عندي، قالتلي بدي ٥ سندويشات
قلتلا تكرم عينك..
وانا عم اقطعن عالكاش قالتلي بصوت واطي والرجفة على
شفافها والغصة بحلقها قالت بس مامعي مصاري….
الشي يلي حسيت فيه خلاني ما اتردد لحظة بأني اطلبلها
السندويشات وعطيتها الأوردر وقلتلا ٥ دقايق وبكونو
جاهزين تكرم عينك..
بدون ولا حرف زيادة..
اخدت الطلب ووقفت على جنب وكانت كتير حاصرة..
فجأة صارت تشهق وتبكي كأنو في بركان جواتها تعبى
عاﻵخير ومعد يقدر يحمل العبئ اللي جواتو…
الطريقة اللي كانت عم تبكي فيها خلت كل اللي حوليها
يتأثروا، قربت لعندها صرت أسألها شبك خالة فيكي شي!!
وهي عم تبكي صارت تقول
”والله انا مالي شحادة والله انا مالي شحادة“
حاولنا نطيب خاطرها ومانحسسها بشي بس ماعد قدرت
تضل واقفة، رجعتلي الأوردر وطلعت برا المحل وراحت
ومارضيت تاخد السندويشات.
اديه في عالم تعبانة وساكتة
اديه في عالم جوعانة ومتحملة
الجوع عم يخلي اصحاب النفوس العزيزة تنكسر وتطلب..
لك لوين لسا رح نوصل!!
انا واثق انو كانت بدها تاخد السندويش لاولادها، ﻷنو لو الها
ماكانت كسرت نفسها لو بدها تموت من الجوع..
وتأكدو انو في متلها كتير ساكتين ومتحملين وصابرين..
الدنيا ماعد بخير، ونحنا مالنا بخير..الناس تعبت وجاعت..
بس رح قول للفقير وللغني أنو الله موجود..
اي شخص مو معو حق سندويشتو يجي يأكل عندي
