المضحك المبكي في “سوريا الأسد حاميها” / أنا أركض وهو يركض…
واحد يقول بقيت يومين واقف بالطابور حتى حصلت على كم لتر بنزين ، ومن التعب نمت من المغرب وفقت الصبح وقبل ماغسل وجهي وقفت قدام باب بيتنا وأنا عم أتمطمط شفت سعدو ابن جيراننا يركض مثل الطلقة وبعد شوي شفت أبوه راكض وراه حفيان قلت خير إنشالله ؟ وبعد شوي إجت مرتو وقالت لي : دخيلك ياجار الحق جارك أبو سعدو والله اذا مسكو لابنو ليموتو ، قلتلا خير شو عامل هالسعدان ؟ .. قالتلي أكل هالمغضوب رغيفين خبز عالفطور .!! … الله لا يوفقو كل الربطة سبع خبزات ونحنا خمسةيعني صفينا بلا غدا وعشا.
قلتلها : تكرمي لبست خفافتي الصينية ومتل العجاج ركضت وراهم. ، صرنا كالتالي الولد عم يركض وأبوه وراه وأنا وراهم الناس اللي بالشارع قالوا يمكن في توزيع معونة … وناس قالو مرخصين اللحمة والفواكه والخضرة اصوات تحيي الحكومة الجديدة والنسوان صارت تزغرد فرحاً وبلشوا يركضوا ورانا…وصل الخبر للشارع الثاني انو في توزيع غاز كمان صارو يركضو وشايلين على ظهرهم القناني الفاضية ، التقوا الكل بالسوق الناس سكّرت المحلات قالوا في زلزال وركضوا ورانا واحد ورا الثاني …. وهيك كل المدينة كانت عم تركض من صباحية الله .
المسا لما رجعت ع البيت بعد ماحلّيت المشكلة بين جارنا وابنو ، وكان الحل إنو الولد يصوم يومين عن الخبز ويلط الأكل لط بالمعلقة بلا خبز.
المهم من التعب تشطحت قدام التلفزيون وحطيت على قناة الاخبارية السورية وإذا أنا طالع بالتلفزيون عم اركض وكل الناس عم يركضوا والمذيعة الله يطول بعمرها عم تقول بكل شفافية ومصداقية : في تحدٍ واضح وصارخ اليوم شعبنا السوري الصامد يخرج عن بكرة ابيه ليعلن رفضه واستنكاره لقانون عقوبات قيصر والتدخل السافر للإمبريالية العالمية والصهيونية للنيل من صمود وطننا الحبيب !!
—————
/ منقول عن الفيسبوك
